يعيش النادي الأهلي فترة صعبة في انطلاقة بطولة الدوري، بعدما جمع 6 نقاط فقط من أول خمس مباريات، في مشهد غير معتاد على جماهير القلعة الحمراء التي اعتادت رؤية فريقها في الصدارة دائمًا.

حالة من القلق والغضب تسيطر على الشارع الرياضي الأهلاوي، خاصة مع الأداء المتراجع والنتائج غير المقنعة.

اقرأ أيضًا.. خطوة مفاجئة من الخطيب للاعبي الأهلي بعد التعادل مع إنبي

خرج الإعلامي محمد سعيد عبر شاشة قناة الأهلي ليكشف عن رؤيته للأزمة التي يمر بها الفريق، موجهًا انتقادات حادة للاعبين والجهاز الفني، ومؤكدًا أن "الأهلي يفتقد روح الفانلة الحمراء" التي طالما صنعت الفارق عبر التاريخ.

وقال سعيد عبر شاشة قناة الأهلي: "ما كانش حد يتخيل، حتى المتشائمين جدًا، إن الأهلي بعد خمس مباريات يحقق 6 نقاط فقط من 15، إنك تكسب مباراة واحدة بس معناه إن في مشكلة كبيرة، والمشكلة مش شرط تكون فنية، لأ في حاجة مش طبيعية".

وأضاف: "حتى أشد المنافسين لو حبوا يعملوا سيناريو سلبي للأهلي، مش هيوصل للشكل اللي إحنا شايفينه دلوقتي، الأهلي تاريخه مليان نجوم، لكن فكرة إن يبقى فيه (معلمين) جوه الفريق دي ما شوفناهاش قبل كده ومش مقبولة".

وأشار إلى أن هناك خللًا واضحًا يحتاج علاجًا سريعًا: "الأداء البدني والفني في الشوط الثاني أقل بكتير من الأول، وده ناقوس خطر، إنبي كان ممكن يكسب الأهلي بسهولة، والفرق المنافسة بقت شايفة الأهلي مطمع".

وتابع: "روح الفانلة الحمراء مش موجودة، القتال لآخر دقيقة مش بشوفه دلوقتي، الجمهور مش فاهم إيه اللي بيحصل، كانوا متفائلين بعد كأس العالم للأندية، لكن بداية الدوري أقل من المتوقع بمراحل".

واستشهد سعيد بكلمات المدرب البرتغالي التاريخي للأهلي مانويل جوزيه: "جوه فريق الكورة مفيش نجم.. النجم هو الفريق، واللي شايف نفسه نجم، النجم في السماء مش على الأرض".

وختم الإعلامي عبر قناة الأهلي: "اللي يرتدي قميص الأهلي لازم يعرف قيمته، جمهور الأهلي أوفى طرف وبيخاف على ناديه، ومن حقه ينتقد وقت الخسارة زي ما بيرفع اللاعب لسابع سما وقت المكسب، اللي مش قد طموحات جماهير الأهلي، مكانه مش هنا".