كشف الإعلامي أحمد شوبير، عبر برنامجه على إذاعة أون سبورت إف إم، كواليس موقف النادي الأهلي من تجديد عقد المالي أليو ديانج، في ظل العروض الخليجية التي وصلت للاعب وعلى رأسها عرض قوي من السعودية.

وقال شوبير إن الأهلي ينتظر عودة ديانج من السفر لفتح ملف التجديد بشكل رسمي، مؤكدًا: "بصوا أنا قلت لكم الأهلي مستني أليو ديانج لما يرجع من السفر عشان يتكلم معاه، وقلت لكم ديانج عنده عروض خليجية، وعلى رأسها عرض مهم جدًا من السعودية، قلت الكلام ده بوضوح يعني".

وأضاف أن النادي يرغب في الحسم سريعًا دون إطالة في المفاوضات، موضحًا: "في النادي الأهلي عايزين يجددوا، لكنه مش هيسمحوا إن الملف يطول، يعني هو هيرجع من السفر وكابتن وليد صلاح الدين بتكليف من مجلس الإدارة هيقعد معاه".

اقرأ أيضًا | كيف يستفيد الأهلي من صفقة حامد حمدان؟.. بديل ديانج و"قلم" جديد لـ الزمالك

وتابع قائلاً: "هيقولوا له: يا باشا إحنا عايزينك ودي عرضنا.. أنت عايز ولا مش عايز؟ لو عايز يا مليون مرحبا أهلا وسهلا ونقعد نتكلم في الشروط".

وأوضح شوبير أن اللاعب يمتلك عرضًا بالفعل، مشددًا: "لكن لو مش عايز، قول لي بس.. لأنه عنده عرض موجود فعلاً دلوقتي، فإذا هو عايز يستنى لحد آخر السنة وفي عرض النادي الأهلي ممكن يستفيد منه وخلاص، وقرر إنه ما يكملش وهيمشي.. خلاص يا سيدي توكل على الله".

وأكد تمسك الأهلي باستمرار اللاعب، قائلاً: "لو عايز تكمل، إحنا عايزينك تكمل، ومرحبين جدًا، وحابين إنك تكون موجود معانا، وانت بقيت لاعب أساسي ولا غنى عنك في الفريق".

وانتقل شوبير للحديث عن ملف حامد حمدان، كاشفًا عن علاقة الأمر بمستقبل ديانج: "على فكرة، بناءً على هذا الكلام هيكون موقف حامد حمدان، خد مني بس كده في ودنك وما تقولش لحد، بجد ولا بهزر".

وتابع: "هيكون موقف حامد حمدان بناءً على قصة ديانج، لأنه الأهلي سيفتقد لاعب مهم جدًا في نص الملعب وهو ديانج، وبالتالي لازم يعوضه، وحمد حمدان من اللاعبين الجيدين، وكان بيلعب في الأهلي زمان".

واختتم شوبير حديثه بالتأكيد على أن هذه المعلومات دقيقة وليست اجتهادات، قائلاً: "دي معلومات ما بقولكش أي كلام، فهنشوف الدنيا عاملة إزاي، لكن في تمسك من النادي الأهلي إلا إذا كان له رأي آخر".