تحدث الإعلامي أحمد شوبير عن أزمة النادي الأهلي بعد الخسارة أمام بيراميدز في الدوري المصري، مشيرًا إلى أن القلعة الحمراء تعاني من عدة أزمات على المستويين الإداري والفني.

وظهر الأهلي بمستوى سيئ للغاية على المستوى الفني والتكتيكي تحت قيادة المدرب، خوسيه ريبيرو، الذي أصبح أقرب للإقالة من الاستمرار.

اقرأ أيضًا | هل يتولى حسام البدري تدريب الأهلي؟.. رد رسمي يحسم الموقف

وقال شوبير في تصريحات عبر برنامجه الإذاعي في "أون سبورت إف إم": "هناك اقتناع من الأهلي أن ريبيرو مدرب كويس، لكن الإدارة الموجودة بتتأثر بالضغوط ومش بتستحمل".

وأضاف: "السؤال دلوقتي: هل الإدارة هتقيل الراجل ولا هتديله فرصة يصلح في التوقف الدولي، مع إنه مش هيكون معاه اللاعيبة الدولية؟"

وأوضح حارس الأهلي السابق: "في رغبة من بعض أعضاء مجلس الإدارة أن يكون في تغيير، لكن القرار متروك للمشرف على الكرة محمود الخطيب".

وتابع: "المشكلة مش بس في الجهاز الفني، كمان في لاعيبة الأهلي. قلت لازم ظهير أيسر، لأن كريم فؤاد حل مؤقت في الجبهة ديه، ومع غياب محمد الشيبي اللي كان موقوف للطرد لم يتم استغلال الأمر جيدًا".

وأشار: "المهاجمين في الأهلي أثبتوا أن الموضوع محتاج مهاجم أقوى، سواء مع محمد شريف أو نيتس جراديشار، والموضوع مش بكثرة الصفقات، الفريق محتاج تنظيم أفضل".

وعن أداء اللاعبين قال: "الأهلي عنده مشاكل كبيرة.. لاعيبة الأهلي مش في حالتها نهائي، لدرجة إنهم من كتر الضغوط كانوا بيباصوا الكرة للاعيبة بيراميدز".

وأكمل: "فوز بيراميدز بيدخله بقوة في المنافسة على الدوري، صحيح الموسم لسه طويل لكن الأهلي مش في حالته وهيحتاج حلول".

واستمر شوبير تصريحاته قائلًا: "هاردلك فقط لجمهور الأهلي، لأنهم الوحيدين اللي كان عندهم رؤية وبيحاولوا يوجدوا حلول، لكن لاعيبة الأهلي بيعانوا من مشاكل كتير كمان".

وواصل: "تعال بقى أقول مين النجوم امبارح؟ ولا نجم في النادي الأهلي اللي بدأوا أو اللي خرجوا، يعني اللي بدأوا قصدي واللي نزلوا ولا واحد أدى حاجة".

اقرأ أيضًا | توبيخ وعقوبات ورسالة لـ ريبيرو.. ماذا حدث في غرفة ملابس الأهلي بعد الهزيمة أمام بيراميدز؟

وأضاف: "لما نزل مصطفى العش مدافع مكان مدافع ما شفناش فروق، أحمد رضا وطاهر ولا حاجة".

وأشار: "في نادي بيراميدز ما تقدرش تقول على التغييرات لأنه الراجل بدأ التغيرات دي في الدقيقة 84 للحفاظ على الفرقة".

وتابع: "تعال شوف قطة أحمد عاطف قطة، هايل، والله هايل، الولد عامل مجهود رائع، في تقريبا كل كرة طالعة من رجله طالعة بالمقاس".

وأردف: "وليد الكرتي، يكفيه إنه سجل هدفين. كلهم دون استثناء أتعبوا دفاع الأهلي كثيرا".

وأكد: "إيفرتون دي سيلفا لسه لم يقدم أوراق اعتماده بالكامل لكنه هو الآخر أتعب دفاع الأهلي كثيرا، محمد حمدي عامل ماتش حلو قوي من الناحية الشمال، كريم حافظ مسدد الفاول اللي جه منه الهدف الأول بقوة شديدة جدا وفي القائم وبعدين يكملها".

وأضاف: "يعني مباراة كلها برمزية من أولها لآخرها بيراميدز ثم بيراميدز ثم بيراميدز، ومافيش تواجد للنادي الأهلي حتى بعد ما تقدم بيراميدز في الشوط الأول واحد صفر".

وأوضح: "الأهلي كان له وجود هجومي شوية في الشوط الأولاني، لكن في الشوط الثاني صدق أو لا تصدق مفيش تسديدة على مرمى أحمد الشناوي".

وتابع: "في المقابل فيه هدف لنادي بيراميدز اللي هو الهدف التاني. توقيت الأهداف في الدقيقة 45 يعني الأهلي حظه كويس إنه دخل فيه جول بدري عنده فرصة إنه يعوض، لكن لا شيء على الإطلاق".

وقال شوبير: "الهدف التاني قتل المباراة في الدقيقة 88 والناس قتلت الأهلي. بعد الهدف التاني كنت متوقع الأهلي هيفوق وهيعمل شغل كويس، لكن لا شيء".

وأضاف: "اللعب بالطريقة اللي هو التحضير مش موجود، الكرات الطويلة مش مظبوطة، الاستلام والكنترول مش بيعملوا حاجة خالص، ما فيش لاعب من الأساسيين أو البدلاء في حالته، الجميع في غير حالتهم".

وأشار: "الأهلي قدام بيراميدز دايمًا قلقان، عنده حتة قلق وخوف وتوتر، والنتايج بتقول كده".

وعن أداء الفريق الأحمر، قال: "هل الأهلي كان يستحق حتى نقطة؟ لأ، الأهلي جاب نقطة لجماهيره اللي يستحقوا التحية بس، جمهور الأهلي فقط لا غير".

وأضاف: "جمهور الأهلي عمل كل حاجة، ملأ المدرجات وشجع من أول دقيقة لآخر دقيقة بكل أنواع الهتافات، لم يخرج عن النص على الإطلاق، وحاول بقدر الإمكان إنه يشد من أزر اللعيبة ويساندهم".

وعن التحكيم قال شوبير: "طاقم تحكيم إسباني بقيادة خافيير روخاس، فيه ناس هتقول الجون الأولاني مش فاول، ماشي، إنت عملت إيه غيرها يعني؟ حتى لو مش فاول ولو فيها تحايل، في كل الأحوال هذا ليس الأهلي".

وختم تصريحاته قائلاً: "الأهلي اللي ظهر بالأمس أزعج جماهيره وأغضبهم. الجماهير حزينة ومتضايقة لأنها كانت داخلة السنة دي شايفة إن الدوري خلاص للأهلي، لكن اللي حصل عكس كده تمامًا".