كشف الكابتن طه إسماعيل، المحلل الرياضي، عن رأيه في بداية مشوار الأهلي مع المدرب الإسباني خوسيه ريبيرو، منتقدًا مستوى الأداء والاختيارات الفنية.

ورحل ريبيرو عن الأهلي يوم أمس، الأحد، بعد 94 يومًا فقط مع المارد الأحمر لم يحقق فيها النتائج المنتظرة.

اقرأ أيضًا | مواعيد مباريات الأهلي في سبتمبر.. قمة الزمالك تتصدر المشهد

وقال طه إسماعيل في تصريحات مع سيف زاهر عبر "أون سبورت إف إم": "بداية النادي الأهلي وحشة جدًا جدًا للأسف، كان أداء مش كويس قصاد مودرن وغزل المحلة وخسارة من بيراميدز وفوز أمام فاركو".

وأضاف: "المدرب مكانش على قدر المسئولية.. خوسيه ريبيرو كان لازم يبقى عنده تواصل أفضل من ده، يواسي لاعب ويضحك مع لاعب، لكن هو معندوش حاجة من ديه خالص".

وتابع: "ديه حاجة سيئة جدًا حتى قراراته في المباريات كانت سيئة، وظهر ده في تبديلاته، لكن السؤال كيف تم التعاقد معه؟".

وأردف: "لازم يكون في إنجازات قبل كده، هل لأنه مدرب رخيص في المرتب؟".

ووجه سيف زاهر سؤالًا: "هل الأهلي هيقف على المرتب عشان يسترخص؟"، وأجابه إسماعيل: "ممكن يكون حب يعوض الفلوس اللي دفعها لـ مارسيل كولر".

وواصل طه إسماعيل تصريحاته قائلًا: "لكن كان لازم يتم تقييم ما يفعله ريبيرو وكيفية تعامله مع اللاعبين".

وأكمل تصريحاته: "ما كانش في تنقل بالكرة مفيش أي نوع من أنواع الجماعية، ما كانش في دفاع كويس، الأهلي كان بره المباراة تمامًا أمام بيراميدز".

وأضاف: "مدرب بيراميدز بيبقى واقف زي الفولة على النار وبيحاول يحمس ويشجع اللاعيبة لكن ريبيرو واقف مش بيعمل أي حاجة، مفيش أي رد فعل".

واستطرد: "كان لازم يتم اختبار له قبل التعاقد معه، مدرب سطحي كثيرًا والأهلي تورط فيه".

واختتم عن البديل القادم: "في ناس كتير كويسة خصوصًا مدربين مصريين، حسام البدري مثلًا ولكن هناك رواسب سابقة لأنه كان في نادي بيراميدز واشتغل هناك فترة كبيرة، لكنه مدرب مميز، ولو هو أو علي ماهر أكيد البدري، لكن حاليًا ممكن يكمل بالجهاز الموجود عماد النحاس وكان ماشي كويس آخر الموسم الماضي".