كشف الإعلامي محمود شوقي، تفاصيل جديدة بشأن موقف محمد الشناوي، حارس مرمى الأهلي، من تجديد عقده مع القلعة الحمراء، موضحًا أن إدارة النادي لديها رغبة في تمديد عقد قائد الفريق لمدة موسم إضافي.

وأوضح شوقي عبر قناته على "يوتيوب" أن الأهلي يستهدف تعديل عقد محمد الشناوي، بما يجعله ضمن الفئة الأولى بين لاعبي الفريق، خاصة أن قيمة عقده الحالي أقل من العقود التي يحصل عليها عدد من نجوم الفريق.

اقرأ أيضًا | مفاجأة في استبعاد أكرم توفيق أمام سموحة.. وسر غياب الساعي ومحمود صلاح

محمود شوقي: الشناوي لا يحصل على 50 مليون جنيه

وقال محمود شوقي: "اللي أعرفه إن الشناوي كان بياخد 18 إلى 20 مليون جنيه، يعني حسب تصاعد السنوات، فماخدش الـ25 مليون جنيه، وماخدش الـ10 مليون جنيه بونص".

وأضاف: "فاللي بيقول إن الشناوي بياخد 50 مليون، وهاني كان عاوز زيه، غير صحيح. لا، الشناوي بياخد 50 مليون؟ الكلام ده غير صحيح".

وأشار إلى أن الأرقام المرتفعة التي حصل عليها الشناوي في بعض الفترات كانت مرتبطة بعقود إعلانية، وليس راتبه مع النادي الأهلي.

الأهلي يجهز عقدًا جديدًا لمحمد الشناوي

وتابع: "الشناوي اتعمل له عقود إعلانية مميزة، يعني الإعلانات اللي شارك فيها الشناوي خد فيها مقابل مالي جيد للأمانة، لكن دي عقود إعلانية بتخضع طول الوقت للعرض والطلب".

وأكمل: "الشناوي لما شارك في بعض الإعلانات خد مبالغ كويسة، وده انطبق بالمناسبة على إمام عاشور السنة اللي فاتت لما أخد 20 مليون جنيه في الإعلانات، وغيره من اللاعيبة خدوا مبالغ كويسة".

وشدد شوقي على أن عقد الشناوي مع الأهلي لم يصل إلى الأرقام التي يتم تداولها، قائلًا: "عقد الشناوي كان 18 مليون، أعتقد إن أكبر زيادة ليه على حسب تصاعد السنوات يعني كان 20 مليون جنيه، فماخدش الـ25 وماخدش الـ10 مليون جنيه بونص".

25 مليون جنيه و10 ملايين بونص

وكشف محمود شوقي عن تفاصيل التعديل المنتظر في عقد محمد الشناوي، قائلًا: "فالأهلي دلوقتي هيعدل عقد الشناوي علشان ياخد 25 + 10 بونص، بخلاف الإعلانات، ويتم تمديد عقده لمدة سنة كمان".

وأضاف: "دي رغبة داخل النادي الأهلي في تعديل عقد محمد الشناوي. ما ينفعش طبعًا اللي حواليه ياخد أكتر منه، لأن ده قائد الفريق، واحد من اللاعيبة القدامى".

واختتم حديثه عن قائد الأهلي قائلًا: "وقبل كده ضحى بأكتر من عرض سعودي بمبالغ كبيرة جدًا جدًا، والناس في النادي الأهلي بتقدر له تقدير كبير".