حسم الإعلامي أحمد شوبير، الجدل المثار حول الحالة الصحية للحارس، محمد الشناوي، لاعب النادي الأهلي، مؤكدًا أن اللاعب يتدرب بشكل طبيعي مع الفريق منذ عودته.

وكان الأهلي قد أعلن عن إصابة الشناوي بعد نهاية مباراة أبو قير للأسمدة في الدوري المصري، لكن الأزمة كانت في استبعاده من قائمة منتخب مصر وتصريحات المدير الفني، حسام حسن، بأنه لاعب منتهي.

وقال شوبير عبر إذاعة "أون سبورت إف إم": "محمد الشناوي تاني، أنا مش فاهم الناس تزعل ليه، أنا بقول لك محمد الشناوي بيتمرن مع الفريق من ساعة ما رجعوا".

وأضاف: "إيه اللي زعل في هذا الأمر؟ هل ده بقى معناه إن أنا بعمل خطأ جسيم؟ الراجل اتشخص إنه عنده إصابة، طلع لا ما عندوش الإصابة دي، والراجل بيتمرن والدنيا تمام، ما فيش مشاكل خالص".

وتابع: "الموقف بيقول لك الحمد لله الراجل سليم، الراجل بيتمرن، الراجل حالته كويسة، يقول لك إنت قلت إن النادي الأهلي أخطأ إنه أعلن إصابة الشناوي، دي وجهة نظر يا أخي، بدليل إنه سليم وبيتمرن، يعني ما فيش مشاكل في هذا الأمر".

وأوضح شوبير: "أنا مش فاهم إيه الحساسية البالغة دي؟ إيه المبالغة في حسابات ومش عارف ده فين وده منين وده ليه؟ والله ما عارف".

وأكد: "أنا ما تعودتش أقول خبر غلط، وإنتوا عارفين لما بقول خبر غلط بقول أنا آسف، أنا قلت خبر غلط، فأنا ما تعودتش أقول خبر غلط خالص".

واختتم: "أنا بقول لك خبر وبقول لك والله العظيم خبري صحيح بنسبة ألف مليون في المية، مع كل احترامي لكل الزملاء اللي بيقولوا غير كده، هم أحرار ولهم كل الحرية، لكن أنا بأكد لك إنه من صحة الخبر".

وأضاف: "وبعدين ده أنا بقول لك الراجل سليم والحمد لله بيتمرن، فإنت تفرح، يعني لما تروح تزور واحد مريض فتلاقيه سليم، بتفرح ولا بتزعل؟ إنت رايح لما تلاقيه سليم تقول: الله ما شاء الله، الحمد لله والشكر لله. فالحمد لله والشكر لله، الراجل سليم، هل في هنا حاجة غلط؟ سبحانك يا رب".