علي محمود: سنواجه برشلونة من أجل الفوز.. ولم أصدق عودتي إلى الأهلي
تحدث علي محمود، لاعب الأهلي، عن عودته إلى القلعة الحمراء خلال فترة الانتقالات الصيفية، مؤكدًا أن ظهوره بشكل جيد مع الفريق خلال معسكر إسبانيا منحه دفعة قوية، خاصة أنه كان يحلم بالعودة وارتداء قميص النادي من جديد.
وقال علي محمود في تصريحات للموقع الرسمي لـ الأهلي: "ربنا كرمني في الآخر ورجعت تاني، والحمد لله، ما كنتش مصدق في الأول إني ممكن أروح النادي الأهلي وأرجع تاني، ولما كلموا النادي كنت مبسوط وفرحان جدًا، وحتى لما كان الكلام بيتقال إني ممكن أرجع، ما كنتش مصدق لحد ما لبست التيشيرت تاني، وكانت لحظة كبيرة بالنسبة لي".
اقرأ أيضًا | عاجل.. محترف الأهلي يطلب الرحيل في الميركاتو الصيفي
وأوضح: "أنا في الأساس بلعب 8، لكن الموسم اللي فات مع إنبي لعبت مباريات كتير في مركز 10، لأن طريقة المدرب كانت محتاجة لاعب في المركز ده، ولعبت كمان 6 و8، لكن مركزي الأساسي 8".
وأضاف أن اللعب مع الأهلي يتطلب تركيزًا خاصًا، قائلًا: "اللعب في الأهلي مختلف، وبتحاول تركز إزاي تشتغل بالكرة وفي المساحات الضيقة وما بين الخطوط، لأنك هتقابل فرق كتير بتلعب بالطريقة دي".
وتابع: "التجارب اللي خضتها قبل كده والملاعب والأجواء الصعبة ساعدتني، ولما لعبت في أجواء أفضل بقيت أهدى، ومش محتاج وقت أو مباريات عشان أدخل في الريتم".
وعن طموحاته مع الأهلي، قال علي محمود: "هدفي إني أكون موجود في منتخب مصر وأقدر أساعد، ومع الأهلي طموحنا إننا نكسب أي بطولة ندخلها. بعد السنة اللي فاتت، الجمهور يستحق إننا نصالحه، وهدفنا السنة دي إننا نكسب كل البطولات".
وأشاد علي محمود بأجواء الفريق خلال معسكر إسبانيا، مؤكدًا: "كابتن وائل جمعة وكابتن حسين عموتة عاملين أجواء تحفة في التمرين والمعسكر والفندق، وكابتن حسين مركز جدًا في التمرين، وإن شاء الله ربنا يكرمنا الفترة الجاية".
وعن مواجهة برشلونة، شدد على أن الأهلي يدخل كل مباراة بهدف الفوز، قائلًا: "برشلونة فريق كبير، بس إحنا برضه النادي الأهلي. أي مباراة بندخلها لازم يبقى هدفنا إننا نكسب، ومش بنبص بنلعب مين، سواء برشلونة أو أي فريق".
واختتم: "إحنا قافلين على نفسنا واللاعيبة كلها مركزة، وهدفنا نصالح الجماهير بالبطولات. لاعيبة الكبار بيساعدونا وبيوجهونا، والجمهور هو اللاعب رقم واحد، ووجوده في ضهر الفريق بيساعدنا كتير إننا نكسب البطولات".
اقرأ ايضا