سيد عبد الحفيظ: أداء الزمالك "نعمة وربنا يحفظها".. ورسالة لجهاز الأهلي المؤقت
خرج سيد عبد الحفيظ، مدير الكرة السابق بالنادي الأهلي، بتصريحات قوية عبر برنامج "اللعيب"، تطرق خلالها إلى أداء القطبين في الدوري المصري.
ورحل المدرب الإسباني خوسيه ريبيرو عن الأهلي بعد 4 مباريات فقط مع الفريق، بسبب سوء الأداء والخسارة الأخيرة ضد بيراميدز.
اقرأ أيضًا | هل يقترب ميكالي من تدريب الأهلي؟.. وكيله يكشف الحقيقة
وقال عبد الحفيظ: "الأهلي والزمالك أسوأ أداء في الدوري المصري؟ صح الكلام، خوسيه ريبيرو خد فرصته كاملة وكان لازم يمشي".
وعن الزمالك وأدائه أمام وادي دجلة، علق: "الزمالك وأداءه في مباراة وادي دجلة؟ نعمة وربنا يحفظها من الزوال لحد مباراة الأهلي".
كما وجه رسالة دعم لزملائه القدامى في الجهاز الجديد، قائلاً: "وليد صلاح الدين أخ وصديق وعشرة ملعب، وإن شاء الله ينجح ويكسر الدنيا، عماد النحاس إن شاء الله تجربة ناجحة جديدة مع الأهلي، وبالتوفيق للجهاز كله مع عادل مصطفى ومحمد نجيب، إن شاء الله يرجع بقوة بعد فترة التوقف".
وعن اتهام الأهلي بالبحث عن مدربين باسترخاص، شدد عبد الحفيظ: "انت عارف رينيه فايلر كان بياخد كام ومارسيل كولر؟ الناس لما بيحصل إخفاق بيبقى عندها استعداد تصدق أي حاجة تتقال".
وفي ملف إمام عاشور وأزمته مع زيزو عبر السوشيال ميديا، قال: "خلينا ننسى اللي فات خلاص فترة وانتهت، لأن اللي جاي حمادة تاني خالص، وده من مصلحة الأهلي والكلام في بعض الأمور ممكن يضر النادي، الفترة اللي فاتت ما كانتش أحسن حاجة، لكن من بكرة هيبقى في جهاز جديد وقرارات جديدة وفترة تانية خالص، اللي فات كوم واللي جاي جديد".
أما عن مستقبل إمام عاشور وتجديد عقده، فأوضح: "ده أمر مع الإدارة، وهي لو شافت أن التجديد مفيد للفريق هيحصل، لكن لو العكس هيبقى في قرار".
وتحدث سيد عبد الحفيظ عن هوية المدرب الأنسب لقيادة الأهلي، قائلاً: "المدرسة الأنسب للفريق؟ انت بتشوف إيه اللي يقدر يقود الفريق بأسلوبه، ويكون عارف القارة الإفريقية والتارجت اللي الأهلي عاوزه كل موسم، ممكن تجيب اسم كبير جدًا، لكن الأجواء في الكرة الإفريقية محتاجة مدرب خبير شوية. لازم يكون عنده قدرات وصفات ومعرفة".
وعن إمكانية عودة رينيه فايلر لقيادة الفريق، أوضح: "كتر الضغوط على الإدارة بتعمل مشكلة، هو طبعًا مدرب مميز وقدم أداء جيد مع الأهلي، لكن محتاجين نسيب الإدارة تشتغل وتجيب الأنسب، ودورنا هو الدعم".
كما علق على ترشيح جوميز قائلاً: "جوميز مدرب كويس، ولكن بلاش نفضل ندور في نفس الأسماء، لازم تكون الدائرة أوسع من كده".
وتطرق عبد الحفيظ إلى ملف مروان عطية وانضمامه لمنتخب مصر رغم الإصابة، قائلاً: "من حق كابتن حسام حسن يختار اللي هو عاوزه. مروان غايب من كأس العالم للأندية يوم 23 يونيو، يعني غايب بقاله شهرين ونصف فترة كبيرة، لكن ممكن كابتن حسام شايف أنها مش عملية عضلية ويقدر يرجعه من خلال التمرينات. وفي النهاية، لو حقق النتائج محدش هيتكلم معاه، لكن لو محققش يبقى الناس حقها تتكلم".
اقرأ ايضا