"هارد لك بصحيح".. أحمد شوبير يكشف كواليس تجديد نجله مع الأهلي
كشف الإعلامي أحمد شوبير، كواليس تجديد نجله مصطفى شوبير، حارس مرمى الفريق الأول لكرة القدم بالنادي الأهلي، بعد إعلان القلعة الحمراء رسميًا تمديد عقد الحارس لمدة موسمين، بالإضافة إلى الموسم الحالي، ليستمر مع الفريق لمدة 3 مواسم جديدة.
وكان الأهلي قد أعلن إنهاء كافة الإجراءات الإدارية والمالية الخاصة بتمديد عقد مصطفى شوبير، خلال جلسة جمعته مع الدكتور عصام سراج، رئيس قطاع التعاقدات، وبالتنسيق مع وائل جمعة.
اقرأ أيضًا.. بعد تمديد عقده.. أرقام مصطفى شوبير تبرز تألقه مع الأهلي ومنتخب مصر
وقال أحمد شوبير، خلال تصريحاته عبر إذاعة "أون سبورت إف إم": "امبارح النادي الأهلي أعلن رسميًا التجديد لحارس مرماه مصطفى شوبير لمدة موسمين كمان، بالإضافة للموسم اللي إحنا موجودين فيه، يبقى القصة 3 مواسم جديدة لمصطفى شوبير مع النادي الأهلي".
وأضاف: "الحقيقة الموضوع ده بالتحديد خد شد وجذب وأخد رد وعطا، وأنا قلت لكم إن النهاية السعيدة دي قادمة لا محالة، يعني مفيش فيها فصال، قد تتأخر قليلًا، لكن النهاية السعيدة قادمة لا محالة، والموضوع محسوم، وكررت أكتر من مرة إن الموضوع محسوم، وقلت إن فاضل تفصيلة صغيرة جدًا جدًا تفصل مصطفى شوبير عن توقيع للنادي الأهلي".
وتطرق شوبير إلى أزمة الشرط الجزائي التي أثارت جدلًا واسعًا خلال مفاوضات التجديد، قائلًا: "نفس القصة الحقيقة طبعًا، وده كان على فئة قليلة جدًا، نفس القصة، قصة الشرط الجزائي وشيطنة الشرط الجزائي، ومش هغير كلمتي، مش هغير، أنا قلت أيوه، الشيطنة كانت في حتة شيطنة يعني، شيطنة الشرط الجزائي والحدوتة اللي حصلت".
وأوضح: "النادي الأهلي يا سيدي والله العظيم الموضوع ما في شرط جزائي ولا في حاجة ولا يحزنون ولا حاجة. ده اقتراح كده طلع عشان يعدوا المشكلة، فقال لك طب تعمل حاجة كده مؤقتة لمدة 40 يوم ولا 45 يوم ولا شهرين ولا حاجة؟ وبعد كده النادي الأهلي قال لا، فخلاص بقت لا".
وتابع: "الشرط الجزائي ده على الصفقة طول الوقت، شرط جزاء موجود معروف، يعني مفيش حاجة اسمها بيبقى لمدة 45 يوم ولا 60 يوم، هو على القصة كلها طول ما فترة قيد الولد مع النادي".
وأكد شوبير: "فكان اقتراح عشان يخلصوا الأزمة، ومن حد داخل النادي على فكرة، عشان يخلصوا الأزمة، وبعد كده نفس من اقترح هذا الشرط الجزائي هو نفس من قال لك: لا، مش هنحط، خلاص، مفيش مشكلة".
وأضاف: "وأنا قعدت أقول وأحلف: يا جماعة والله ما في الكلام الفارغ ده، وكل ده كلام، هارد لك هارد لك هارد لك يا جماعة، اسمعوا الكلام، والله الموضوع هيخلص يا جماعة".
وانتقد الإعلامي حالة الجدل التي صاحبت المفاوضات، قائلًا: "وبعدين بدأت ناس تنفخ وناس تسخن وناس تعمل، يا جماعة بالراحة، الموضوع مش محتاج كل الدوشة دي لولد ابن النادي، والقصة معروفة داخل النادي".
وأشار شوبير: "حق الولد إنه كان يفكر شوية، حقه إنه كان يسرح في عرض نادي كومو الإيطالي، الرابع على الدوري، شوية. حقه إنه كان يحلم إنه يلعب في بطولة أوروبية، في دوري أوروبي، حقه إن خياله يروح إلى آخر الدنيا، حقه، حقه".
وانتقد ما وصفه بمصادرة أحلام اللاعبين وطموحاتهم، موضحًا: "فالناس حتى بدأت تصادر على الأحلام للأسف الشديد، أنا آسف إن أنا بقول هذا الكلام. الناس من خلال السوشيال ميديا بدأت تصادر على الأحلام، على الطموحات المشروعة".
وأردف: "يا أخي، راجل بيقول لك سيبني أسبوع أفكر، سيبني أسبوعين أفكر، سيبني 10 أيام أفكر، والقصة كلها منذ أن قدم النادي الأهلي عرضه لمصطفى شوبير إلى أن وقع ما أخدتش أيام".
اقرأ أيضًا.. متى يعود محمد الشناوي لحراسة مرمى الأهلي؟
وكشف شوبير تفاصيل اللحظات الأخيرة قبل توقيع العقد، قائلًا: "اللي حصل ده كان قبل السفر لمعسكر إسبانيا حصل يوم، قعدة، رجعوا من إسبانيا حصل يوم تاني، قعدة، امبارح تقريبًا كانت ثالث قعدة أو رابع قعدة وتم التوقيع وخلصت الحدوتة".
وأضاف كاشفًا تفاصيل ما حدث داخل النادي الأهلي: "دخل مصطفى شوبير على النادي، قال لهم: يلا عايز أمضي. بالضبط كده، اللي أنا بقوله لك ده بالضبط اللي حصل: يلا عايز أمضي".
وتابع: "كان حتى دكتور عصام سراج موجود، يعني في الماليات في المبنى الثاني، فقال له: طب يا مصطفى، أنا بس بخلص حاجات وبتاع، خلاص يبقى خلينا بعد التمرين".
واستكمل: "فالمهم وجاء الكابتن سيد عبد الحفيظ كمان، فقال لهم: أنا أهو ومن غير شرط جزائي. فقعدوا يضحكوا، يعني وصلت، الكابتن سيد بدأ يضحك، الدكتور عصام سراج يضحك، كابتن وائل جمعة بيضحكوا".
واختتم أحمد شوبير تصريحاته بالتأكيد على انتهاء الأزمة، قائلًا: "فالمهم خلصت الحدوتة يعني، بعيدًا عن الشيطنة وبعيدًا عن محاولات الشيطنة، وتوتة توتة توتة وخلصت الحدوتة".
اقرأ ايضا