"الأهلي قال لا".. تطورات مفاوضات تجديد محمد هاني وياسر إبراهيم
تطرق الإعلامي أحمد شوبير إلى آخر تطورات مفاوضات النادي الأهلي مع الثنائي محمد هاني وياسر إبراهيم، بشأن تجديد تعاقدهما مع الفريق، موضحًا تفاصيل المفاوضات وموقف النادي من مطالب اللاعبين.
اقرأ أيضًا | "هارد لك بصحيح".. أحمد شوبير يكشف كواليس تجديد نجله مع الأهلي
وقال أحمد شوبير، خلال تصريحاته عبر إذاعة "أون سبورت إف إم": "إيه اللي بيحصل في موضوع بقى محمد هاني وياسر إبراهيم؟ محمد هاني بالتحديد أنا قلت لك إنه عايز يبقى متقدر شوية".
وأضاف: "حضرتك ومعاك بقى كل الحق تقول لي متقدر يعني إيه؟ يعني عايز فلوس زيادة؟ لا، متقدر يعني، ما حضرتك برضه ابعد بقى عن سياسة الهارد لك عشان أعرف أرد عليك، لأنه ده مهم".
وأوضح: "الأهلي عرض الرقم وخلاص بقى، يعني معلن، للأسف ما بحبش أقول فلوس لكن أقوله لك، يعني الأهلي عرض 25 مليون، اللي هو سنوي، و10 مليون بونص، اللي هو الفوز بالبطولات".
وتابع: "طب الـ10 مليون دي محسوبة إزاي أو تدفع إزاي؟ هنا نقطة الخلاف، إنه أنا عايز بس أقول لكم يا جماعة وركزوا معايا، موضوع العقود ده بيتم التعامل معاه إزاي؟ إنه بيبقى مثلًا 25% اسمها نسبة مشاركة".
وشرح شوبير نظام نسبة المشاركة، قائلًا: "يعني إنت لو ما حققتش، مهما كان اسمك بقى، ما حققتش من نسب المشاركة مثلًا 60% ولا 65% ولا مش عارف كام، يتخصم لك 25% من هذا العقد".
وأضاف: "تخيلوا بقى اللي الناس مفكرة إنه لا، يتخصم 25% من هذا العقد. فمحمد هاني اللي طلبه بالتحديد، يعني إن البونص هنا مرتبط في الأهلي أكثر بالبطولة الإفريقية، أيا كان مسماها، وبطولة الدوري العام".
وأوضح: "فهاني قال لهم: دي تربطوها ليه بنسبة المشاركة؟ يعني خلوها مالهاش علاقة بنسبة المشاركة".
وأكد شوبير أن الأهلي يتمسك بسياسة موحدة في عقود لاعبيه، قائلًا: "الأهلي وللمرة الألف هو عامل خلاص سياسة موحدة على كل لاعيبته".
وتابع: "وفي كل الأحوال كانت الأمور مقضية ومرضية وخلصانة يعني، فهو هاني قال لهم: يا جماعة أنا راجل لعبت فوق 400 مباراة، ده مثبت دلوقتي بقيت 430 مباراة، وإن شاء الله بكرة لو لنا نصيب يلعب يبقى 404 مباراة".
وأضاف: "فيعني شيلوا نسبة المشاركة بحيث إن هو يضمن في كل الأحوال إنه يبقى له البونص".
وأشار إلى تمسك الأهلي بموقفه، قائلًا: "فالنادي الأهلي قال: لا، مش هنعمل ده، إحنا حاطين نظام وده النظام بتاعنا وده اللي إحنا هنمشي عليه".
وأكد شوبير أن مفاوضات تجديد عقد محمد هاني تقترب من النهاية، قائلًا: "ففي انتظار توقيع كابتن محمد هاني، وأنا بقول لك في النهاية هو موضوع هيخلص، يعني زي لما قلت لك موضوع مصطفى شوبير هيخلص، هو موضوع محمد هاني برضه هيخلص في هذا الأمر يعني، وتبقى الأمور انتهت".
وانتقل شوبير للحديث عن موقف ياسر إبراهيم، قائلًا: "أما ياسر إبراهيم اللي أنا قلته هعيده وأزيده، رغم إن البعض بيطلع يقول لك مش عارف إيه، ياسر زعلان شوية، زعلان شويتين، زعلان تلات شويات".
وأوضح: "عشان كان نفسه يتوافق على العرض بتاع نادي الشباب السعودي اللي كان بمليون و600 ألف دولار في السنة، وكان في وعد مسبق يعني إن لو جاله حاجة هيوافقوا له عليها، يعني إنه يتحرك".
وأضاف: "ولكن النادي رأى إن الظروف لا تسمح برحيل أو مغادرة ياسر إبراهيم الفريق دلوقتي".
واختتم أحمد شوبير تصريحاته قائلًا: "فلسه اللي هو إيه، واخد على خاطره شوية، تلاتة، والقصة برضه ما زالت في إطار التفاوض حتى هذه اللحظة. هذا كل ما يخص التجديدات".
اقرأ ايضا