عدلي القيعي يفتح النار على لاعبي الأهلي: مفيش لاعب أكبر من الدكة
فتح عدلي القيعي، رئيس شركة الكرة الأسبق بالنادي الأهلي، النار على لاعبي الفريق بعد التعادل مع القناة بنتيجة 3-3 في بطولة الدوري المصري، وخسارة نقطتين جديدتين في سباق المنافسة على اللقب.
وأبدى القيعي غضبه من تكرار الأخطاء الدفاعية واستقبال ثلاثة أهداف في مباراة واحدة، رغم الإمكانات الكبيرة التي يمتلكها الفريق.
وقال القيعي في برنامج "ملك وكتابة" على قناة الأهلي: "لاعيبة الأهلي بتاخد عشرات الملايين، والمفروض تكونوا مميزين عن اللي حواليكم، لما تكون كفتكم مش أرجح في مباراة، نقول هارد لك في ماتش ولا اتنين، لكن إن الأهلي يخسر نقطتين بالشكل ده، ويدخل في مرماه 3 أجوال في ماتش واحد، يبقى لازم نقف ونسأل إيه اللي بيحصل".
وأضاف: "كيف يستقبل الفريق 3 أهداف بنفس الطريقة؟ أي خصم يشتت الكرة تشكل خطورة على الأهلي، كيف يتكرر هذا الأمر؟ دي حاجات مينفعش تعدي من غير ما يكون فيه وقفة ومراجعة لكل التفاصيل".
وتابع القيعي: "هنقول مدرب؟ مدرب إيه؟ مش كل ما تحصل مشكلة نحط المسؤولية كلها على المدير الفني، لأن فيه لاعيبة جوه الملعب مسؤولة عن تنفيذ الأدوار المطلوبة منها، ولازم كل واحد يراجع نفسه ويشوف هو بيقدم إيه للفريق".
وأكد القيعي "فيه لاعيبة بتقدم مستوى مختلف مع المنتخب، وشوفناها من فترة قريبة بتلعب بشكل أفضل، فإيه اللي اتغير؟ هل فيه تقصير؟ هل فيه حالة من التعالي؟ ولا فيه ناس مش مقدرة حجم النادي اللي بتمثله؟ الأسئلة دي لازم تتطرح بصراحة".
وانتقد القيعي المشهد المتعلق بتدخل مدير الكرة في الجوانب الفنية أثناء المباريات، قائلًا: "لم أشاهد من قبل مدير كرة، زي وائل جمعة، يتحدث في نقاط فنية ويدخل في نقاش مع المدير الفني أثناء المباراة، المشهد ده بيلخص بعض الأمور، فيه خلل في الكتالوج، وده مش دورك يا كابتن وائل".
وشدد القيعي: "مفيش لاعب أكبر من الدكة، مهما كان اسمه، وإحنا مش مطالبين نتحمل حد.. الأهلي أكبر من أي حد".
واختتم القيعي: "لازم كل لاعب يبص لنفسه ويعرف هو بيقدم إيه، لأن الأهلي له اسم وجماهير عندها طموحات، ومينفعش المستوى والنتائج يكونوا بالشكل ده، والمطلوب إن كل واحد يرجع لمستواه ويثبت إنه يستحق يكون موجود في الفريق".
اقرأ ايضا