تحدث حسام غالي، نجم الأهلي ومنتخب مصر السابق، عن عدد من الملفات الخاصة بالقلعة الحمراء والكرة المصرية، كما تطرق إلى أزمتي محمد صلاح وحسام حسن، وكشف عن كواليس مهمة من مسيرته الاحترافية وعلاقته بعدد من المدربين واللاعبين الذين عاصرهم.

وقال حسام غالي في تصريحات عبر قناة "أون سبورت": "كنت شايف نفسي أكتر في منصب عضو مجلس إدارة الأهلي وكنت حاسس إني أقدر أقدم أكتر لأني حافظ الأهلي وعارف عيوبه ومميزاته، لكن الظروف مساعدتش أو الكيميا مكنتش راكبة".

وتحدث غالي عن تراجع المواهب وارتفاع أسعار اللاعبين في سوق الانتقالات، وقال: "المواهب قلت جدًا عن زمان، وفي بعض الناس علت سوق الانتقالات بشكل مبالغ فيه، ولو الأهلي دخل في أي صفقة بقى معناه إن النادي لازم يطلب كتير، ودخول بيراميدز في السوق المصري أثر على سوق الانتقالات وغلى الأسعار، لكن الأرقام حاليًا مبالغ فيها من حيث الأداء المقدم."

وعن تصريحات حسام حسن الأخيرة بشأن محمد الشناوي، قال حسام غالي: "حسام حسن غلط في كلمة منتهي عن الشناوي، لكن أنا متأكد هو ميقصدش الكلمة دي، وهو مش بيعرف يختار الألفاظ بشكل كويس".

وتطرق نجم الأهلي السابق إلى أزمة محمد صلاح وغيابه عن منتخب مصر، قائلًا: "اللي زعلني وخلاني أشوف إن المشهد الرياضي غريب في مصر هو معالجة أزمة صلاح وغيابه، مفيش حد فكر يتكلم عن الموضوع فني، وكله صفى الحسابات الشخصية مع حسام حسن، وكل اللي كان كاتم اللي جواه عن حسام حسن من قبل كأس العالم بيطلع عليه دلوقتي وعايز يخلص عليه".

وأضاف: "عملوه ساندوتش ومشفعش للمدرب اللي قدمه في كأس العالم، وإنه جمع المصريين حوالين المنتخب والروح في المنتخب، كل ده اتنسى بمجرد الكلمة اللي قالها، رغم إنها مش في محلها ولي عتاب فيها على حسام حسن".

وعن قرار استبدال محمد صلاح خلال مباراة أنجولا، قال غالي: "تغيير صلاح ضد أنجولا مش في محله، وحسام حسن لم يوفق في قراراته في المباراة، وصلاح مينفعش يطلع في التوقيت ده".

وتحدث غالي عن الضغوط التي يتعرض لها حسام حسن، قائلًا: "أنا بشفق على حسام حسن لأنه مضغوط بشكل رهيب وعليه حملة رهيبة، وناس عمالة تصفي حسابات، وواضح إنه مبقاش مرغوب فيه، وفي ناس هتقفله على الوحدة الفترة الجاية".

ووجه غالي نصيحة إلى المدير الفني لمنتخب مصر، قائلًا: "نصيحتي ليه لازم حسن يتعامل بذكاء في الأحاديث الصحفية وميخليش حد يمسك عليه حاجة ويفتح عليه جبهات كتيرة في وقت واحد، وأنا بحب كابتن حسام جدًا وطول عمري بحبه من أيام الأهلي".

واستعاد حسام غالي ذكريات تجربته في الملاعب الإنجليزية، قائلًا: "كنت مستمتع بكرة القدم في إنجلترا وكنت حاسس وقتها إني لاعب كورة بجد، ولو عاد بي الزمن مكنتش هرجع من رحلة الاحتراف".

وكشف غالي عن رأيه في إمكانية وصوله إلى المكانة التي وصل إليها محمد صلاح، وقال: "كان ممكن أوصل للمكانة اللي وصلها محمد صلاح، وأنا في توتنهام وكيلي كلمني مرة وقالي مانشستر يونايتد بيتابعوك، فكان ممكن أوصل للي وصله صلاح، ليه لا؟".

وعن المدرب الأكثر تأثيرًا في مسيرته، قال غالي: "أكتر مدرب له فضل عليا هو مانويل جوزيه، وهو أكتر مدرب اتخانقت معاه برضو".

وتحدث نجم الأهلي السابق عن زملائه في خط الوسط، قائلًا: "محمد شوقي أفضل لاعب لعب معي في وسط الملعب، وحسام عاشور وأحمد فتحي كانوا بيريحوني".

وعندما طُلب منه توجيه كلمة إلى حسن شحاتة، قال غالي: "ربنا يسامحك يا كوبر".

أما عن حسن شحاتة، فقال غالي: "حرمني من ماتشات وبطولات كان ممكن ألعبها وملعبتهاش لسوء تفاهم بيننا، لكن أنا بحبه جدًا وهو راجل حقيقي".

وكشف حسام غالي تفاصيل الخلاف الذي حدث بينه وبين حسن شحاتة، موضحًا: "خلافي مع حسن شحاتة لأني كان بيخيرني في 2008، وصلني عرضين وقولتله إيه رأيك؟ هختار ألعب في ديربي لأني هشارك أكتر، قالي اللي إنت عايزه، وبعدها اختارت ديربي كاونتي ومضمنيش في كأس القارات بعدها مباشرة".