أكد محمد الشناوي، قائد الفريق الأول لكرة القدم بالنادي الأهلي، أهمية مباراة كيتارا الأوغندي، المقرر إقامتها ضمن منافسات إياب دور الـ32 من بطولة كأس الكونفدرالية الإفريقية، مشددًا على رغبة الفريق في تحقيق الفوز وحسم التأهل إلى دور المجموعات.

ويلتقي الأهلي وكيتارا الأوغندي مساء اليوم، الأحد، في تمام الساعة السابعة مساءً بتوقيت "القاهرة".

وقال الشناوي في تصريحات عبر المركز الإعلامي للنادي الأهلي: "مباراة مهمة، وإحنا على طول بنقول إنها بتبقى 180 دقيقة، إحنا خلصنا الشوط الأولاني هناك، والشوط التاني عندنا في مصر. أكيد بالنسبة لنا مباراة مهمة عشان نصعد لدور المجموعات".

وأضاف: "داخلين بكل تركيزنا، وبنحضر دلوقتي بشكل جيد للمباراة، واللعيبة كلها مركزة، أي فرقة بتلعب في إفريقيا بيبقى فيه شوية صعوبات، ممكن بسبب السفرية اللي إحنا سافرناها، كانت طويلة شوية، لكن في الأول وفي الآخر الحمد لله نجحنا في الشوط الأولاني إن إحنا نطلع بنتيجة إيجابية، وإن إحنا كسبنا".

وتابع حارس الأهلي: "الماتش التاني عندنا، وأكيد طبعًا بتلعب في وسط ملعبك ووسط جمهورك، أكيد هتبقى الأمور مختلفة، اللعيبة كلها هتبقى مركزة، وبالنسبة لنا عايزين نكسب عشان نتأهل للدور اللي بعده".

واختتم الشناوي تصريحاته قائلًا: "أكيد طبعًا اتفرجنا على الماتش الأولاني، وبنتفرج على النقط الإيجابية والنقط السلبية اللي كانت موجودة عندنا، كل مباراة بنخوضها بحدة، والمباراة اللي جاية نفكر فيها بس، وده أهم حاجة بالنسبة لنا، إن إحنا نكسب، لأن دي بطولة تانية غير بطولة الدوري، ونفكر إن إحنا نصعد لدور المجموعات".