كشف سامي هلهل، الحكم المساعد السابق، عن واقعة طريفة جمعته بالحكم الدولي السابق إبراهيم نور الدين خلال إحدى مباريات الأهلي أمام المقاولون العرب، والتي شهدت موقفًا غير معتاد بسبب اعتقاد نور الدين وقتها بتعرضه للسحر، في لقطة انتهت بحوار كوميدي داخل أرض الملعب.

وقال سامي هلهل، خلال حديثه مع الإعلامي أحمد كانو عبر برنامج "كورة بلس": "كان عندي مباراة للأهلي أمام المقاولون العرب، وكان إبراهيم نور الدين حكم الساحة، وطارق مجدي الحكم الخامس، ووقتها مكنش فيه تقنية الفيديو، وكان فيه حكم خامس".

وأضاف: "إبراهيم نور الدين كان جتله فترة بيقول لنا إنه بيتعمله سحر، وإنه مش بيشوف الكورة صح، وممكن يحسب الكرة جوه وهي بره، وكان مؤمن بالكلام ده، وحاسس إن فيه حد عايز يوقعه".

وتابع الحكم المساعد السابق: "في المحاضرة قبل المباراة، إبراهيم قال لنا: يا جماعة بعد إذنكم أنا عايزكم تساعدوني في كل حاجة، واللي يشوف أي حاجة يقولها، لأن أنتوا عارفين الظروف اللي أنا بمر بيها، فطارق مجدي قاله طبعًا يا إبراهيم، وأنا كمان قلتله كلنا هنقف جنبك".

واستكمل هلهل روايته قائلًا: "المباراة كانت ماشية بشكل كويس، وفي الشوط الثاني كانت النتيجة 1-1، والأهلي كان في منافسة على الدوري، وجت لعبة عندنا كانت محتاجة تحديد إذا كان فيها تسلل ولا لأ، فقلت العب".

وأوضح: "بعد ما قلت العب، الكرة دخلت منطقة الجزاء وحصلت عرقلة، وأنا ساعتها شفت إن فيه ضربة جزاء، لكن إبراهيم نور الدين فجأة قال للحكم الخامس طارق مجدي: هايل يا طارق، أنا شوفت اللي أنت شوفته، مفيهاش أي حاجة".

وواصل: "طارق مجدي رد عليه وقاله: على فكرة أنا ما اتكلمتش يا إبراهيم، فإبراهيم استغرب وسأله: أمال مين اللي اتكلم؟ وأنا قولتله بهدوء: أنا يا إبراهيم، فسألني بتتكلم بتقول إيه؟ قولتله أنا بقول العب، مفيش تسلل".

واختتم سامي هلهل تفاصيل الواقعة قائلًا: "إبراهيم رد عليا وقال: العب مفيش تسلل؟ ده فيها اتنين ضربة جزاء، وطارق مجدي قاله: ما أنا استغربت يا إبراهيم إنك ما حسبتهاش، فرد عليه إبراهيم: طب أنت ما قلتليش؟".

وأكد هلهل، ردًا على سؤال أحمد كانو بشأن ما إذا كانت اللعبة لصالح الأهلي أم ضده، أن الواقعة كانت في مباراة شهدت احتساب قرار لصالح الفريق الأحمر.